Wednesday, October 20, 2004

சிஸ்கோவில் ஒரு மாற்றம்

bay-mv

அமெரிக்க பொருளாதாரம் விழுந்து, சிக்கலில் தவித்த கடந்த மூன்றாண்டுகளில் குடாப்பகுதியில் என்னென்னவோ நடந்திருக்கிறது. ஏகப்பட்ட இந்தியர்கள் திரும்பிச் சென்றார்கள். வாங்கி வைத்த பொருள்களை எல்லாம் ( வீடு உட்பட) கிடைத்த விலையில் விற்றுவிட்டு, சோகத்துடன் போவது என்பது அனுபவித்துப் பார்த்தால்தான் தெரியும். அந்தக் காலகட்டத்தில் இங்கு இருக்கப் பிடிக்காமல் அலுத்துப் போய் தானாக வேலையை ராஜிநாமா செய்து விட்டு , ஊருக்கு போனவர்களைக்கூட தமிழ்நாட்டில் எல்லோரும் 'வேடிக்கை' பார்த்தார்கள். சுஜாதா(த்தா) "என்.ஆர்.ஐ மாப்பிள்ளைகள் வேலை இழந்தார்கள்" என்று எழுதினார். கல்லுரிகளில் கம்ப்யூட்டர் துறை, மாணவர்கள் இல்லாமல் ஈயடித்தது. சாஃப்ட்வேர் இஞ்சினியர்கள் சன்னிவேல் அபார்ட்மெண்டுகளில் 'வறுமையின் நிறம் சிவப்பு" கமல் ஸ்டைலில் வாழ்ந்தார்கள். வால்மார்ட்டிலும், மெக்டொனால்டிலும் 8$ க்கு வேலை பார்த்தார்கள். ஸ்டாக் மார்க்கெட்டுகளில் ஏகப்பட்ட பணத்தை இழந்த ஓரளவு வசதி படைத்தவர்கள், தெனாலிராமன் வளர்த்த பூனை போல முடங்கிக் கிடந்தார்கள். பஸ் ஸ்டாண்டுகள் இந்திய மென்பொருளாளர்கள் இல்லாமல் வெறிச்சிட்டன.

பொருளாதாரம் மெதுவாக மீண்டெழுந்தாலும், முழுவீச்சில் இன்னமும் சோம்பல் முறிக்கவில்லை. போன வாரத்தில் வந்த job report மறுபடியும் ஸ்டாக் மார்க்கெட்டை கொஞ்சம் கீழே தள்ளி இருக்கிறது. வீரப்ப நெருப்பில் நேற்று இணையம் வெந்து கொண்டிருந்தபோது, நண்பன் பேசினான்.

பச்சை அட்டை sponsor செய்வதில்லை என்ற கடந்த இரண்டு வருடங்களில் எடுக்கபட்ட முடிவை சிஸ்கோ வாபஸ் வாங்கி இருக்கிறது. ஏறக்குறைய 25000 ஊழியர்கள் பணிபுரியும் சான்ஹோசே அலுவலகத்தில் எண்பது சதவீதத்துக்கும் மேற்பட்டொர் இந்தியர்கள் மற்றும் சீனர்கள். இந்த முடிவு அவர்கள் வயிற்றில் பீர் வார்த்திருக்கும் என்பதில் ஐயமில்லை. இந்த முடிவு இன்னமும் இரண்டு வாரங்கள் கழித்து எடுக்கப்பட்டிருந்தால், என் நண்பன் சிஸ்கோ லண்டன் கிளைக்கு சென்றிருப்பான். ஏனெனில் ஹெச்-1 விசாவில் இங்கே வேலை செய்ய வந்த அவன் காலக்கெடு - ஆறு வருடம், முடிவதாக இருந்தது. வாங்கிய காரையும், மற்ற மதிப்பு மிக்க மற்ற சாமான்களையும் விற்றுவிட்டு போக நேர்ந்திருப்பதை பற்றி விசனப்பட்டுக் கொண்டே இருந்தான்.

இந்த முடிவுக்கு இன்னொரு முக்கிய காரணம் - ஊழியர்களுக்கு வழங்கப்படும் கம்பெனி பங்குகள் இனி கம்பெனி செலவுக்கணக்கில் ஏறப்போகின்றன. இதன் விளைவால், இனி பங்கு விலைகள் முன்னைப்போல வானளாவி வளராது. அதன் விளைவால் ஏகபட்ட ஊழியர்கள் விலகுவார்கள் என்று நிர்வாகம் எதிர்பார்ப்பதால், ஏற்கனவே இருக்கும் வெளிநாட்டு ஊழியர்களையும் விட்டு விடக்கூடாது என்று சமயோசிதமாக முடிவெடுத்திருக்கிறார் ஜான் சேம்பர்ஸ். இவர்தான் கம்பெனியின் C.E.O. உதாரண CEO என்று அமெரிக்காவில் பாராட்டப்படுகிற இவர், கம்பெனியை பழைய நிலைக்கு கொண்டு வரும் வரை $1 மாதச்சம்பளம் போதும் என்று உறுதி பூண்டிருக்கிறார். இவரைப் பற்றி இன்னொரு நாள் விரிவாக எழுதுகிறேன்.

சிஸ்கோ நண்பர்களுக்கு இது நிஜமாகவே ஒளிமிகுந்த தீபாவளிதான்.

வாழ்த்துக்கள்.

பி.கு :

காணாமல் போன கும்மோணம் வெங்கட்டு மறுபடியும் இங்கே.

Wecome back Venkat.

1 comment:

  1. இப்போதான் வெங்கடேஷின் பொருள்வயின் பிரிவில் சோகத்தைக் கொட்டிட்டு இங்க வந்தா கொஞ்சம் உயர்ரக சோகம்போல கதையைக்கொண்டுபோய் சிஸ்கோவின் நம்பிக்கையான செய்தியுடன் முடித்துள்ளீர்கள். நல்ல பதிவு.

    ReplyDelete

 ஃபெட்னா-2023 --பாட்டுக்கு பாட்டு ??  - கூத்தோ கூத்து  ----------------------------------------------------------------------------------- ஃ...